أفكار مجنونة في الطبخ

وش رأيك اكسري الروتين ........

و ميزي أكلتك و تفنني و تذوقي شيئا جديدا .........

هذي شوية أفكار جنان تسوينها بالمطبخ ...........

1 . بعد ما تقطعي سلطتك الخضراء ... اسقيها لبن رايب و رشي شوي شرائح زيتون وملح و ليمون ....

2 . على الشاي الأخضر أو الأسود أضيفي من ورد المدينة الطازج بدلا من النعناع ....... وشوفي

3 . وزعي شرائح الهامبرجر في صينية و وزعي عليها جبنة صفراء مبشورة أو شرائح أو موزاريلا

و رشي عليها شوية طماطم مبشورة و دخليها الفرن إلين تسيح الجبنة

4 . السلطة الحارة ( الدقس ) لا تحطين لها طماطم خليها بس خضراء ( كزبرة + نعناع + فلفل حار + ثوم + ملح + ليمون )

5 . خلي دايما صوص الآيس كريم بنكهة الشكولاته عندك بالمطبخ يشهي على الحلى

اعصري منها فوق أي قطعة حلى تقدميها ان شالله يارب لو قطعة كيكة سادة عادية حطي فوقها شوية صوص

ولا تنسي مصمصة الأصابع زي الأطفال ...

6 . خلي كفتتك اليوم أو لحمتك أو أرزك بطعم الشواء حطي في قطعة قصدير شوية زيت و مستكة

ثم جيبي الجمرة وحطيها جوة القصدير حيطلع بخار رائحته جميلة و غطي الأكل جيدا اكتميه

حتى يتبخر و ياخذ ريحة الشواء على الفحم .

( انتي عارفه ؟ ممكن تبخري ثلاجتك أو حتى البيت من ريحة السمك بهاذي الطريقة )

7 . مكرونة الفوتوشيني صلحيها بصلصة الطماطم المسبكة حقتك المعتادة

بدلا من الكريمة اللي مليانه دسم و كشني لها بصل + فلفل رومي + فطر ( ماشروم )

بلاش الطريقة هاذي لو ما تحبين صلصة الطماطم و تبغين الفوتوشيني بيضا....

حطي لبن زبادي و قطع دجاج و ذرة و ثوم مهروس بدلا من الكريمة .....

8 . لكي تعطي لطعم صلصتك اللي بالطماطم دسامه لذيذة و كثافة و نكهة طعمه حطي عليها علبة قشطة ...

9 . غيري الحلى اللي كل يوم بسبوسة كيك كريم كراميل جلي ......... يوووووه طفشنا

حطي في قدر( ثلاث كاسات ماء + كاسة حليب بودرة + نص كاسة سكر + ثلاث ملاعق بودرة شكولاته + ثلاث ملاعق نشاء )

قلبي هذه المكونات الين يغلي المزيج و يتخن ثم اضيفي علبة قشطة + لوز حجازي محمر مقرمش وقلبي هذا كله

و بعدين صبيه في كاسات الآيس كريم أو صحون عميقة للحلى و رصيها في الثلاجة و لما تقدميها بعد ما تبرد

حطي فوق الوجه مكسرات مطحونه او بسكوت مطحون او كريم شانطيه او نقطة قشطة من فوق الوجه بدلا من الكريمة

10 . كثر عندك التفاح في الثلاجة و حرام ذبل و ما أحد حياكله اعمليه مربى حبيبتي و لا ترمي النعمة ........

قشري التفاح و قطعيه أرباع و انزعي البزر من داخله و الأوصال الناشفة و حطيه في قدر و رشي فوقه

شوية سكر حسب الرغبة و كاسة مويه خليه يتسبك و يتهري على نار خفيفة.....التفاح ترى حيطلع مويه

و بعدين عبيه في برطمانات و يم يمي عملتي مربى و يمكن توزعي منه للجيران ولصحباتك و تقولي لهم

مربى عمايل يدي

11 . بدل الليمون ....... استخدمي خل العنب ترى مره يخسس .......

12 . للشوربة الخفيفة رشي بقدونس من فوق الوجه و الشوربة التخينة رشي فوقها عيش محمر ...

( معلومة لرشاقتك ........

البقدونس ترى مرا زيييين لما تاكليه مع الأكل يعمل زي المغناطيس يلم و يجذب كل الدسم و يخلصك منه

و من شره ... )

13 . ايش رايك جنب الستيك اللحم و الدجاج تعملين حاجه غريبه عجيبة ........ بس لزيزة

هاتي البطاطس اللي انهرت من السلق و اهرسيها أو اطحنيها بالخلاط و حطي عليها شويه ملح و فلفل أبيض

أمسكي الطاوة الصغيرة و امسحي بالفرشة الطاوة بالزيت ورشي شوية شابورة ( بقسماط )

و حطي مقدار بسيط من البطاطس عشان تعملي قرص خفيف و ساويه بالملعقة اللي كل شويه تبليليها بالمويه

ويالله قلبي كل شويه القرص دا اللين يتحمر ... و حطيه في الصحن على شكل نصف دائرة جنب المشويات

او الاستكات .....

14 . غيري من شكل الكبسة حقتك ولونيها ........ شلوووون ؟؟؟؟؟

امسكي البطاطس و الكوسة و الباذنجان و الجزر والبصل و الفلفل الرومي وقطعيهم كلهم مكعبات صغيرة قد بعض

و أقلي كل واحد على حدا و صفيهم من الزيت و رشي هذه الألوان على كبستك اليوم !!!!!!!!!

15 . تحبين الموز ؟ تحبين المعصوب ؟ تحبينه مع النواشف الجبن و الزيتون شئ حلو ..... يالله

قطعي الموز شرائح مدوره و حطيها بشكل عشوائي غير مرتب في الصحن و حطي فوقها في الوسط قشطة

و رشي العسل فوق الكلام دا بشكل عشوائي و همممممممممم بالخبز غمسي .... ( معصوب نص كم )

16 . أي أكله إيدام مثلا أو شئ فيه مرق أو مخلل سويتينه كثر ملحه لا تخافين على طول قشري بطاطس

واغسليها جيدا و غطسي البطاطس وسط تمص الملح الزايد بالأكل ...

17 . إيدام الكوسة المفضل لديك أو السبانخ أو الباذنجان غيري اليوم و زودي في مذاقه الحلو .....

اسلقي ( حمص طبيخ مو البليلة يعني مو الحمص اللي حبوبه كامله اسمه حمص طبيخ )

اسلقيه و حطي شئ بسيط منه على إيدامك يعجبك جربي ........

18 . اكتشفت ان البهار اللي يعطي للشواء نكهته ورائحته الزكية هو........... الكزبرة الناشفة

19 . عندي أطفال و أبغى أعلمهم ياكلون لوحدهم و نفسي ياكلون لحمه ....... أوكيه

صلحي أرز أبيض عادي و من فوق الوجه اعملي لهم كرات اللحم المفروم و رصيها فوق الأرز

ورشي شوية بقدونس لأنهم بحاجة لفيتامينات.....

20 . تحبين الأندومي ؟ إليك خلطتي المفضلة ...........

كشني بصل و فلفل رومي و ماشروم اذا في .....

و بعدين حطي عليهم قشطة و قلبيهم مع الأندومي ولا تنسين بهارات الأندومي تحطينها .......

21 . تبين كبسة مميزة ما أحد من ضيوفك صلح مثلهاااا ؟؟؟؟؟؟؟؟؟؟؟؟؟؟

عادي صلحي الأرز الأبيض بالصورة العادية و خلي الكشنة حقتك حقت الكبسة خارجية ياليت تخلي كشنتك

فيها مزازة بملح الليمون نقطة منه بس وفيها معجون طماطم يعني لونها أحمر بقوة و بعد ما ينضج الأرز الأبيض

أحط كشنتي اللي كلها صلصة طماطم على الأرز و أقلبه مع بعض ..... وشوفي قد ايش بتكون لزيزة

( قيد جربتي قشر البرتقال في كشنة كبستك ؟؟؟؟؟ شكلي بأنضرب .... ترى جربي وما أنت خسرانه )

22 . هل أنت من عشاق الفووووول ؟؟؟

افتحي علبة فول مدمس معلب و صبيه بمويته بالخلاط و حطي عليه فصين ثوم + حبة طماطم كبيرة مقشرة

+ كمون + فلفل أسود + ملح واطحني الكل بالخلاط جيدا

و بعدين خليه شويه على النار إلين يبقبق و يغلي مزيج الفول اغرفيه في صحون عميقة شوي

و رشي من فوق الوجه البصل الأخضر و البقدونس والزيت الزيتون ....

23 .طبختي سمكة في الفرن و لما نضجت لقيتيها ناشفة صلحي على طول كشنة بصل و طماطم و بقدونس

طبعا مع الزيت على النار و صبي الكشنة الحلوه على السمكة الناشفة و قدميها ........

24 . عندك دجاج مسلوق بالثلاجة و مستحرمه ترميه أخذتي مرقته و محتاره فيه ........

فصصي الدجاج وقطعيه مكعبات صغيرة و ابشري عليه جبنتك المفضلة موزاريلا او شيدر اللي تحبيه

و ابشري فلفلة رومي و جزر واخلطي الخضار و الجبن والدجاج وبعدين وزعيه فوق قرص خبز في صينية فرن

ودلعي الموضوع بشرائح زيتون ويالله دخلي الصينية الفرن ثواني بس الين تسيح الجبنه ( كأنها بيتزا دجاج )

وقدميها ملهلبه ساااااااااااااااخنه ... [/size]

» ملف الطبخ المتكامل
» أفكار رائعه لترتيب دولابك الخاص